我在周一頭條日報的專欄講到大陸管理層控制股市的策略與局限，口水太多，想講多幾句QDII(合資格境內投資者機制)都無機會，所以係網誌再補充一下。

　　所謂QDII係指內地資金透過受管制渠道投資海外的機制，它和QFII（合資格境外投資者機制）是孖公仔，不過方向相反，QDII是引大陸錢到香港及海外，QFII是引海外錢入大陸。

　　幾年前香港提出內地可以搞QDII時，陸羽仁和香港和大陸幾個相關部門的官員傾過，當時香港在０３年大遊行前後衰到貼地，港官力推QDII，正所謂北水南調，想引大陸水來買港股，推番高個股市。但當時一個大陸官員同我講，大陸股市一樣咁衰，股市得１０００點，股票無人買，若果再打開這個閘門，讓內地資金流出，會唔會搞死內地股市o架？結果大陸原則上讚成搞 QDII，細節慢慢研究。陸羽仁一直認為，內地反對QDII的人好多，但係又唔好意思拒絕香港，驚打擊香港本來已弱小的心靈，所以就放慢手腳研究。

　　結果年幾前QDII終於出籠，但主要投資海外定息工具，回報唔吸引，自然不合內地股民脾胃，無乜人吼。今次QDII新措施主要是擴闊投資範圍，一半可以投資港股，另一半可投資基金或其他定息產品，總額度大約有１１００億港元。

　　我搵熟悉QDII制度的高人傾吓，高人自然大力唱好，話要注意一兩件事，第一是內地發表有關QDII的通告提到「有秩序資金外流」，等如話洩洪，這是內地首次咁講，亦即是肯定QDII有為大陸股市降溫的作用。其次是要看新措施推行得幾快，而家是用額度和範圍限制。高人話，如果你驚QDII唔得，無人投資，又唔駛太擔心，因為唔得可以搞到得，如果唔得，還可以再放寬投資範圍，再降低投資門檻（現在是３０萬）等，反而如果QDII太得，搞到內地股市暴瀉，反而可能會煞車。

　　亦有人話QDII只有一半可投資股票，數額太少，高人話，而家一半可投港股，但另一半亦可投基金，那些基金亦可投港股，所以加埋估計有六、七成，已經不少，而且唔夠將來還有再加碼的可能。

　　綜合而言，陸羽仁有此判斷，QDII擴大範圍之後，唔會太得，亦唔會唔得。所謂唔會太得，係相比A股而言，對內地股民來說，始終不如買A股咁方便，所以不會一下子有好多人轉哂透過QDII買港股，可能初期反應只屬一般。不過內地股市或許會有反應，會借勢調一調。同時港股會借勢炒一炒，但如果一下子升得太狼，例如一升升４００點、５００點，追入就要小心，因住短線接了火棒，中石油（０８５７）事件前車可鑑，一時間睇得太好，升得太多，好快又回一回（或者係輪商作怪，之前發了太多認購輪，突然來個好消息，唯有質番低補番的貨）。

　　我亦話QDII「唔會唔得」，既然內地A股喪炒完後可以炒要用外匯買的B股，轉炒H股絕對唔奇，如今又開出QDII的渠道，不但可以非法炒港股，更可以合法炒港股，現時A股市場只計流通股份的市值大約３至４萬億，而港股中H股加紅籌的市值約５至６萬億，其實香港同類股份的市場比內地還要大，今次打開一條通道，等如變相增加股票供應，照計會吸走一部份「穩陣錢」來香港炒「便宜」股。估計最先炒的應該唔係匯豐，而係內地有上A股的H股，同時也可以炒將回歸A股的中移動（０９４１）或中石油（０８５７）等巨股。

　　最理想的格局是QDII慢慢加熱，過幾個月逐步煲起H股和紅籌巨股，內地股市略略降溫，無升得咁急就無爆得咁快，咁港股在下半年就有機會上探高位了，不過世事唔知有無咁理想呢？